Францияда миллий байрам — Бастилия ишғол қилинган кун нишонланадиган 14 июль санасида Париж шаҳрининг асосий авеньюсидан Елисей саройига қадар ҳудудда тантанали парад бўлиб ўтди.

Маҳаллий вақт билан соат 10:00да Франция президенти Франсуа Олланд унинг президентлиги давридаги охирги энг йирик байрамда иштирок этиш учун ташриф буюрди. У бош штаб раҳбари Пьер де Вилье ва Париж шаҳри ҳарбий коменданти Брюно Ле Рэ ҳамроҳлигида ҳарбий қисмларни кўрикдан ўтказди.

Шундан сўнг, давлат раҳбари Келишув майдонида йиғилган фахрий меҳмонлар даврасига қўшилди. Бу гуруҳда ҳукумат аъзоларидан ташқари, Сенат ва Миллий Кенгаш вакиллари, Париж ҳокимияти вакиллари, Франция ТИВ раҳбари Жан-Марк Эйро ҳамда Янги Зеландия бош вазири Жон Ки бор эди. Маросимга АҚШ Давлат котиби Жон Керри ҳам таклиф қилинганди, лекин айни вақтда у Москвага 2 кунлик сафар уюштирган.

Парадни Patrouille de France ҳаво кучлари қисми самолётлари очиб берди. Самолётлар Париж осмонида Франция рамзларидан бири уч рангни ҳосил қилиб учишди. Уларнинг ортидан кўп функциялик Rafale ва Mirage 2000 қирувчи самолётлари ҳавога кўтарилишди. Шунингдек, парвозга бошқа самолётлар ҳам кўтарилди - жами 55та техника.

Шундан сўнг, Елисей майдонига олиб борувчи кўприкда австралиялик 140 нафар ва янги зеландиялик 85 нафар ҳарбий иштирокидаги бўлинмалар саф тортиб ўтди. Улар Биринчи жаҳон уруши давридаги Сомма бўйидаги жангга 100 йил тўлгани муносабати билан таклиф қилинган. 

Бастилиянинг озод қилиниши байрами Парижда хавфсизликни таъминлаш чоралари кучайтирилган шароитларда ўтказилди. Терактлар таҳдиди туфайли чоршанба ва пайшанба кунларида 11,5 минг нафар полиция ва жандарм мобилизация қилинди. 3 мингдан ортиқ жандарм айни вақтда Елисей саройи хавфсизлиги учун жалб этилган.

Парадни жонли равишда томоша қилишни истаганлар бир неча тўсиқлардан ўтиб бориши керак бўлди.

Ҳар йили 14 июль куни бутун Франция миллий байрам — Бастилиянинг олиниш кунини нишонлайди (La Fête Nationale / Bastille Day). 1789 йил бу куни парижликлар қалъа-қамоқхона ҳисобланган, қиролликнинг ваҳшийлигини ифодаловчи Бастилияга ҳужум қилиб эгаллаган ва маҳбуслар озод этилган. Бу воқеа Буюк буржуа қўзғалони бошланиши ва яккаҳокимлик устидан қозонилган ғалаба ҳисобланади. Францияда бу байрам нишонланиши кўламини Янги йил байрамини кутиб олиш билан тенглаштирса бўлади.