Туркманистон оқсоқоллар кенгаши 14-сентябрь куни Ашхободда мамлакатнинг янги Асосий қонунини қабул қилади, деб хабар қилмоқда РИА «Новости».

Қайд этилишича, мажлисни ўтказиш санаси тўғрисидаги қарорни мамлакат президенти Гурбангули Бердимуҳаммедов имзолаган. 

Янги қонуннинг ҳозирги конституциядан асосий фарқи, президентлик ваколатларига оид муддатнинг 5 йилдан 7 йилга узайтирилганидадир. Бундан ташқари, президент лавозимига белгиланган юқори ёш чеклови ҳам бекор қилинмоқда. Шу пайтгача, 70 ёшдан кекса киши давлат раҳбарлигига номзод бўла олмас эди.

Аввалроқ, Бердимуҳаммедов мамлакат конституциясини Туркманистоннинг «замонавий сиёсати ва ижтимоий-иқтисодий тараққиёти талаблари»га мослаштириш зарурлигини айтган эди.