"Наполи" жамоаси мухлислари жамоа ҳужумчиси Гонсало Ҳигуаиннинг рақиблар жамоасига ўтиб кетишидан норозиликларини ифода этишда давом қилишмоқда.

Неаполликларнинг асосий ҳужумчиси "Ювентус"га ўтиши ҳақидаги хабарлардан кейин Неаполь шаҳри майдонида Ҳигуаин исми туширилган футболкани ёққан мухлислар жамоанинг машғулотлар ўтказиладиган базасига келиб, безориликни давом эттиришди.

Бу ерда мухлислар жамоа етакчилари тасвири туширилган баннерда Ҳигуаиннинг суратидан бош қисмини олиб ташлашган.

"Наполи" ва "Ювентус" футболчининг трансфери бўйича келишувга эришиб бўлган. Футболчи камида 90 миллион евро эвазига трансфер қилинади. Ўтган мавсумда А Серия тўпурари бўлган ушбу ҳужумчи янги жамоаси билан 5 йиллик шартнома тузади ва йилига 7,5 миллион евро миқдорида маош олади.