Рио-де-Жанейрода бўлиб ўтадиган 2016 йилги Олимпия ўйинларида 272 нафар россиялик спортчи иштирок этадиган бўлди. Бу ҳақида РФ спорт вазири Виталий Мутконинг маълумотига таяниб, РИА “Новости” маълум қилди. 

Халқаро олимпия қўмитаси (ХОҚ) ижроқўми Олимпия ўйинлардан Россиялик спортчиларнинг ҳаммасини ҳам четлатмади. Ижроқўм Риодаги Ўйинларда айнан кимлар иштирок этишини белгилаш ҳуқуқини халқаро спорт федерацияларига қолдирди. Шуниси аниқки, допинг билан қўлга тушган россиялик спортчилар 2016 йилги Олимпиадада иштирок этишмайди. 

“Бугунга келиб, 272 нафар спортчига Олимпия ўйинларида қатнашишга изн берилди. Бу борадаги сўнгги қарор эртага чиқарилади, бир қатор спорт турлари бўйича баҳсли жараёнларга нуқта қўйилади. Биз мезонларнинг айнан бизнинг жамоамизга нисбатан жорий қилинганлигини кўриб турибмиз”, - деди Мутко Спорт вазирлиги коллегиясининг мажлисида. “Биз турли стандартларнинг мавжудлигига гувоҳ бўлдик. Мамлакат раҳбарияти, биз ва федерациялар томонидан ҳаммаси айтиб бўлинди. Энди диққатимизни жамлаб, ишимизни қилишимиз керак”, - дея қўшимча қилди у.