Afg‘oniston g‘arbidagi Hirot provinsiyasida sayyohlarga hujum uyushtirildi, natijada 10 kishi halok bo‘ldi, 5 kishi jarohatlandi. Bu haqida mahalliy hukumat vakili Farhod Qadimiy Sinxua agentligiga ma'lum qilgan.
“Bugun ertalab Chishti-Shafif tumani bo‘ylab harakatlanayotgan xorijiy sayyohlardan iborat ikkita mikroavtobus qurollangan kishilar hujumiga duch keldi. Buning natijasida 10 kishi halok bo‘ldi, 5 kishi jarohatlandi”, - deya ma'lum qildi Qadimiy.
Sayyohlar Bamian provinsiyasidan Hirotga qarab ketayotgan bo‘lishgan, ularning ba'zilari Afg‘oniston xavfsizlik xizmati xodimlari tomonidan qutqarilgan.
Mahalliy politsiya tergov ishlarini boshlab yubordi. Halok bo‘lganlarning qaysi davlat fuqarolari ekanligi haqida hozircha ma'lumot berilmadi.
Mintaqadagi hech bir radikal guruh hozircha hujum uchun mas'uliyatni o‘z zimmasiga olmadi.
