Қозоғистондаги эълонлар сайтида нефть ва олтин бор бўлган ерларнинг сотилиши ҳақида хабар пайдо бўлди. Унда нефть бор бўлган ер майдони 3 млрд тангага, олтин бор бўлган ер эса 760 млн тангага сотилаётгани айтилган.

"Қизилўрда вилоятида 0,6 млн тоннадан 2 млн тоннагача нефти бўлган 2000 гектар ерим бор. Ер менга тегишли эканлигини исботловчи ҳужжат ва нефть борлиги ҳақида геологоразведка компаниясининг хулосаси бор. Агар жиддий таклифлар бўлса сотаман. Савдолашиш имкони, вариантлар бор", дейилмоқда шундай эълонлардан бирида. 

Яна бир эълонни Жезқазғанда олтин конига эга ернинг эгаси берган. Унинг айтишича, бу кон ўзидан тайёр ва ишга туширилган ишлаб чиқариш мажмуасини акс эттиради.

Майдон эгаси конда қазиб олинадиган олтиннинг ўртача миқдори бир тонна тупроққа 6-8 грамм олтинни, 20-25 грамм кумушни ташкил қилишини айтган.  

У, шунингдек, сотиладиган майдонга олтин қазиш ишларини олиб боришга рухсат берувчи ҳужжатлар, жумладан ердан 2020 йилгача фойдаланиш бўйича шартнома, тоғ-кон ишлаб чиқариш ускуналаридан фойдаланишга лицензия, портлатиш ишларини олиб боришга рухсатнома, шунингдек, барча тегишли рухсат берувчи, техник ва геологик ҳужжатлар илова қилинишини маълум қилган. 

Бундан ташқари, сайтда мармар, шағал, ғишт тупроғи, қурилиш қуми ва гипс конларининг сотилиши ҳақидаги эълонлар ҳам берилган.