АҚШ президенти лавозимига номзод Дональд Трамп қалтис гаплари деб яна гап-сўзларга қолди. У қуролни эркин сақлаш ва олиб юриш тарафдори бўлганларга бу ҳуқуқларни кафолатловчи АҚШ Конституциясига иккинчи тузатишнинг сақлаб қолинишига курашда бу тузатишга қарши чиқаётган Хиллари Клинтонни Оқ уйга йўлда ўзлари "тўхтатишлари" мумкинлигига шаъма қилганликда гумон қилинди.

"Хиллари Иккинчи тузатишни бекор қилмоқчи, – деб айтди Трамп Уилмингтон шаҳридаги намойишда. – Агар у судьяларни ўз истаганича танлай олса (АҚШ Олий судига), унда сиз йигитлар ҳеч нарса қила олмайсизлар, Бироқ, Иккинчи тузатиш тарафдорлари бўлганлар, балки нимадир қила оларлар, қандайдир чора бўлса керак, яна билмадим", деб нималаргадир шаъма қилган Трамп.

Трампнинг бу гапларидан кейин Клинтоннинг тарафдорлари орасида "Дональд Трамп кимдир Хиллари Клинтонни отиб ташлаши кераклигини таклиф қилди" деган сарлавҳалар билан хабарлар тезда тарқала бошлаган.

Трамнинг сайловолди штаби унинг сўзлари нотўғри қабул қилинганини тушунтиришига тўғри келган: Трамп америкаликларни сиёсий масалаларни ҳал қилиш учун қўлларига қурол олишга чорламаган, балки "уларнинг бирлашиши катта куч" эканини назарда тутган.