Лондонда яшовчи 71 ёшли аёл Дорин Пеши Royal Academy of Dance рақс мактабида битирув имтиҳонларини муваффақиятли топширгач, Буюк Британиядаги энг кекса балет раққосасига айланди. Бу ҳақда Daily Mail нашри хабар берди. 

Нашрнинг маълумотларига кўра, Дориннинг ёшлигида унинг ота-онаси фарзандининг рақсга ўқишига пул тўлай олмаган. Муҳандис-электрик бўлиб ишлаган аёл 10 йил аввал пенсияга чиққач, болаликдаги орзусини амалга оширишга қарор қилди ва балет билан шуғуллана бошлади. 

Аёл бир нечта машғулотлардан кейин рақс мактабида имтиҳон топширди. Унга имтиҳонлардан ўтгани ва мамлакатдаги энг кекса балет раққосасига айлангани маълум қилинди. Энди аёл охирги мажбурий босқичларга ҳафтасига 3 мартадан мураббий билан ва ҳар куни мустақил равишда тайёрланмоқда.

2016 йил апрелда британиялик Вердус Хаес 100 ёшлик таваллуд кунида жаҳон рекордини янгилаб, дунёда парашютда сакраган энг кекса одам бўлишга ҳаракат қилган. У маҳаллий шифохоналарга ёрдам пули тўплаш мақсадида инструктор билан бирга парашютда сакраган.