Немис оғир атлетикачиси Алмир Велагич Die Welt нашрига берган интервьюсида Собиқ Иттифоқ ҳудудидаги давлатлар спортчилари доимий равишда допинг қабул қилиши борасидаги гумонларини баён этган.

"Агар Рио мусобақаларини кузатаётган бўлсангиз, шармандаликка гувоҳ бўлишингиз мумкин. Фаолиятини эндигина бошлаган ёш спортчилар буюртма беришдаёқ жаҳон рекордларига яқин келишмоқда.

77 кг вазн тоифасида ғолиб бўлган қозоғистонлик спортчига қарайлик, (Нигат Рагимов – таҳр. Kun.uz), у допинг учун жазоланиб қайтгач, ўз натижасидан 40 кг оғирроқ тошга буюртма берди. Кўринишидан дисквалификациядаги 2 йил унга салбий таъсир кўрсатиш ўрнига, бу унинг фойдасига бўлган. Энди шу аҳволда иштирок этиб, жаҳон рекордини қўймоқда. Бу шунчаки кулгили.

– Сизнингча Россия терма жамоаси четлатилиши – ҳали бошланишими?

– Ҳа, четлатилиши керак бўлган бошқа терма жамоалар ҳам бор.

– Қайсилар?

– Собиқ Иттифоқ давлатлари – Қозоғистон, Грузия, Беларусь, Украина.

– Қозоғистондан Лондон олимиадасидаги 4та олтин медаль олиб қўйилди. Нега ҳеч нарса ўзгармаган?

– Қаранг, у ерда кимлар раҳбарлик қилади. Допинг можароларидан кейин ҳам мураббийлар ўз ўринларида қолаверишади. Улар минбарга сакраб чиқишади ва ҳайқиришади: «Қозоғистон – биринчи рақамли!» Бу циркка айланиб бормоқда.

Германия терма жамоаси бош мураббийи Оливер Карузо эса рақибларни доимий допинг истеъмол қилишда айблаб, Ўзбекистон, Беларусь, Арманистон, Молдова, Руминия ва Украина оғир атлетикачиларини мусобақаларда четлатиш фикрини илгари сурган.

Рио—2016 нинг оғир атлетика мусобақасида Ўзбекистон шарафини ҳимоя қиладиган Руслан Нуриддинов 15 август куни олтин медалга эга чиқди. Унинг асосий рақиби сифатида қараладиган спортчи — қозоғистонлик Илья Ильин Рио-де-Жанейро Олимпиадасига ташриф буюрмаганди. У тақиқланган модда истеъмол қилгани сабаб Олимпиададан четлатилган.

Маълумот учун, 29 июль куни Оғир Атлетика Халқаро Федерацияси Россия терма жамоасини ёзги Олимпиада ўйинларидан четлаштирганди.