Мисрлик дзюдочи Ислом ал-Шехаби Рио-2016 Олимпиадаси доирасида исроиллик Ору Сассонга қарши мағлубиятли беллашувдан кейин рақиби билан қўл бериб хайрлашмагани учун хайфсан олди ва уйига жўнатиб юборилган. Бу ҳақда Халқаро Олимпия қўмитаси сайтида маълум қилинган.

Мазкур ҳодиса 12 август куни, +100 килограмм вазн тоифасида 1/32 финалда татамига чиққан Сассон ва Шехаби ўртасидаги беллашувдан сўнг юз берганди. Учрашув исроиллик дзюдочининг ғалабаси билан якунланган, баҳс якунлангач, мисрлик спортчи дзюдода қабул қилинган таъзим ўрнига бошини секингина эгиб қўйган. Ғолиб Шехабининг олдига қўлини сиқиш учун келганида, у рақибини рад этиб, татамидан чиқиб кетганди.

ХОҚ Шехабининг бундай ҳаракати Олимпиаданинг қадриятлари сифатида муҳрланган фейр-плей ва дўстлик руҳияти принципларига мос эмаслигини маълум қилди.