Рио-де-Жанейро олимпиадасининг бокс бўйича мусобақаларида 3та вазн тоифасида ғолиблар аниқлаб бўлинган. 

Шу вақтгача Ўзбекистон, Россия ва Бразилия вакиллари биттадан олтин медаль қўлга киритди. Ўзбекистон терма жамоаси яна битта бронза медаль ҳисобига умумий жадвалда биринчи ўринда жойлашган. Шу вақтгача медаль олган жамоалар сони жами 11та.

Ўзбекистон терма жамоасида Ҳасанбой Дўстматов олиб келган олтин медалдан ташқари, яна бир боксчи, Шаҳрам Ғиёсов финалга чиқиб, камида кумуш медаль нақд қилинган. У бугун Қозоғистон вакили Данияр Еллиусиновга қарши рингга чиқади. Яна 3 нафар ўзбекистонлик боксчи эса ярим финалдаги иштирокни таъминлаб, яна 3та медаль олиниши кафолатланган.

Қозоғистоннинг 2 нафар боксчиси финалга чиққан, яна бир қозоғистонлик боксчи ярим финал жангида иштирок этади. Шунингдек, ҳозирча 3та бронза медаль олган Куба терма жамоасининг 1 вакили финалга чиққан.

Битта олтин медаль олиб бўлган Россиянинг яна 2 вакили ярим финалда. 

Ўзбекистон, Куба, Россия, Озарбайжонда 1тадан чорак финал баҳслари олдинда турибди. 

Нақд медаллар бўйича:
1) Ўзбекистон ва Куба 6 тадан;
2) Қозоғистон 4та;
3) Россия ва Франция 3та;
4) АҚШ, Озарбайжон 2та

Ҳозирги вазиятда Куба терма жамоасида медаллар сони бўйича якунда Ўзбекистонни қувиб ўтиш имконияти мавжуд. Шунингдек, Қозоғистоннинг 3 нафар боксчиси финалда ғалабага эришса, якунда бу терма жамоа Ўзбекистондан юқорида туради.

Бу натижалар Ўзбекистон боксида натижалар кўрсатиш бўйича кескин ўсишни кўрсатмоқда. Солиштириш учун, 2008 йилги Олимпиадада (Пекин) Ўзбекистон бокс терма жамоаси ўрин олмаган, 2012 йили Лондон шаҳри мезбонлик қилган олимпиада эса битта бронза медаль эвазига 16-ўрин эгалланган.