Авиакомпания самолёт бортида туғилган қизчага мисли кўрилмаган ажойиб совға тайёрлади

Lifestyle 20 Август 2016 19123

Гоҳида чақалоқлар ёруғ дунёга келишга шу даражада шошилишадики, тўлғоқ жараёни исталган пайт, исталган жойда рўй бериши мумкин. Айнан шу ҳолат Дубайдан Манилага парвоз қилаётган самолёт бортида туғилган Хейвен исмли қиз билан содир бўлди.

Унинг онасида тўлғоқ аломатларидан ҳеч нарса йўқ эди, чунки ҳомиладор аёлнинг кўзи ёришига беш ҳафта қолган эди. Бизнингча, Хейвен самода бўлаётган парвоз пайтини қўлдан бой бергиси келмаган ва айнан мана шу дамларда ёруғ дунёга талпинган. 

Авиакомпаниядагиларнинг сўзларига кўра, бу экипаж аъзолари учун биринчи ана шундай ҳолатдир. Аммо улар ўзларини яхши тутишган ва туғуруқни муваффақиятли амалга оширишган. Шунингдек, йўловчилар орасида ҳамшира ҳам топилган. Ёш боласи бор йўловчилар эса янги онага кичкинтойга зарур нарсаларни бериб, кўмак кўрсатишган.

Барчаси тезда, ортиқча қийинчиликларсиз содир бўлган. Туғуруқ жараёнидан кўп ўтмай, она ўз ўрнига қайтган.

Лайнер капитани она ва унинг боласини шифохонага элтиш учун Ҳиндистонга қўнишни амалга оширган. Албатта, бу воқеа сабаб парвоз вақти кечикиб қолган, аммо йўловчилардан ҳеч бири бундан ранжимаган. Аксинча, улар мана шундай бахтли лаҳзаларга гувоҳ бўлишганидан мамнун бўлишган.

Энг яхшиси чақалоққа насиб қилган. Cebu Pacific Air авиакомпанияси раҳбарияти қизалоққа миллион авиамиль совға қилган. У ушбу миллардан бутун дунёга парвозда фойдаланиши мумкин. Ушбу совға беш миллион филиппин песосига ёки 108.000 АҚШ долларига тенг. Авиамиллардан фойдаланиш вақти эркин. Ундан нафақат Хейвен, балки унинг оила аъзолари ҳам фойдаланишлари мумкин.

Кўпроқ янгиликлар