АҚШ расмий шахслари делегацияси турк мухолиф имоми Фатҳулла Гуленнинг экстрадиция қилиниши шартларини муҳокама қилиш учун Туркияга йўл олади. Гулен 15 июлда Туркияда амалга оширилган давлат тўнтарувига уриниш иши бўйича айбланмоқда. Бу ҳақда Hurriyet нашри хабар бермоқда. 

Нашр маълумотларига кўра, музокараларга АҚШ адлия вазирлигининг 3 ходими ва Давлат департаментининг бир ходими жўнайди. Улар АҚШдан 22 августда учиб кетадилар. Кейинги икки кунга учрашувлар ўтказилиши белгиланган. 

Туркия адлия вазирлигида америкалик ҳамкасбларини кутиб олишга тайёрликлари айтилди. Вазирлик вакилларининг айтишларича, улар АҚШ томонига экстрадиция ҳақидаги сўровни ва Гуленнинг айбдор эканлигининг исботини тақдим қилишмоқчи.

Гуленнинг ўзи 17 августда Туркия ҳукуматига топширилишидан кўрқмаслигини айтган. "Мени экстрадиция қилишларидан қўрқмайман. Агар улар бунга қарор қилишса, шундай бўла қолсин. Акс ҳолда, давлат тўнтарувига уринишни тергов қилиш бўйича халқаро гуруҳ ташкил этишсин", деб айтган Гулен. 

Гулен турк мухолифи бўлиб, "Хизмет" ҳаракати асосчиси ҳисобланади. 1999 йилдан бери АҚШнинг Пенсильвания штатида яшайди ва яшаш учун рухсатга эга. У Туркияда давлат тўнтарувига уринишни ташкиллаштиришда айбланмоқда. Туркия бош прокуратураси унга 1,9 минг йиллик қамоқ жазоси сўраган. Гуленнинг ўзи айбини инкор қилиб келмоқда.