Бугун Бразилиянинг Рио-де-Жанейро шаҳрида ёзги олимпиада ўйинлари ниҳоясига етади. Тошкент вақти билан 22 август куни тонгида, соат 4-00да Маракана стадионида XXXI ёзги Олимпиаданинг ёпилиш маросими ўтказилади.

Ёпилиш маросими бразилиялик мусиқачилар иштирокида кечиб, олимпиада иштирокчиларининг паради ўтказилади ва олимпиада байроғи Токио-2020 ташкилий қўмитасига топширилади.

Маросим сценарийси Рио карнавалининг машҳур мутахассиси Роза Магалаес томонидан тайёрланган. Норвегиялик таниқли диджей Киго ҳам маросимда чиқиш қилиши ҳақида айтган.

Олимпиада 5 август куни старт олганди, асосий мусобақалар Рио-де-Жанейро шаҳрида кечди, фақат футбол бўйича ўйинлар турли шаҳарларда ўтказилди.

Бу илк марта Жанубий Америка қитъасининг Олимпиадага мезбонлик қилиши бўлди. Бу шунингдек 1968 йилдаги Мехико Олимпиадасидан кейин Лотин Америкаси мамлакатида илк марта Олимпия ўйинлари ўтказилиши бўлди.

Олимпиадада 306та медаллар шодаси ўйналди, иштирокчи делегациялар сони бўйича рекорд натижа қайд этилди - 206. Косово ва Жанубий Судан терма жамоалари илк марта Олимпиада иштирокчиси бўлишди.