Ўзбекистонлик боксчилар яна бир олимпиада олтин медалига эга бўлди.

Олимпиаданинг 52 килограммгача бўлган боксчилари ўртасидаги турнирида Ўзбекистон шарафини ҳимоя қилаётган Шаҳобиддин Зоиров бугун финал олтин медаль учун жанг ўтказди.

У россиялик тажрибали боксчи Миша Алоянга қарши рингга чиқди ва рингда тўла устунлик қилиб, ҳакамлар қарорига кўра ғолиб деб топилди.

Ўзбек боксчиси жангни тўғри тактика асосида жуда яхши бошлади. У рақибга аниқ зарбалар бериб, мустаҳкам ҳимояланаётган эди. Аммо биринчи бўлим ўрталарида у рақибнинг 3-4та аниқ зарбасини ўтказиб юборди. Шунга қарамай, у ўзига келиб олди ва раунд сўнгида йўқотилган очколарни тиклашга ҳаракат қилди. Биринчи бўлим учун ҳакамларнинг икки нафари устунликни Алоянга, бир нафари Зоировга берди. 10:9, 9:10, 9:10.

Иккинчи раунд ўзбекистонлик спортчининг тўла устунлиги остида кечди. Шаҳобиддиннинг кетма-кет аниқ зарбалари Мишани деярли мувозанатдан чиқарди. Ҳакамларнинг барчаси иккинчи бўлим учун устунликни боксчимизга беришди. Натижада сўнгги бўлим олдидан ҳисоб 20:18, 19:19, 19:19 кўринишга келди. 

Учинчи раундда ҳам вазиятни назорат қилган ўзбекистонлик спортчи ғалаба қозониб, олтин медаль билан қайтадиган бўлди: 3:0 — 30:27, 29:28, 29:28!

Бу Ўзбекистон делегацияси учун Риодаги учинчи олтин бўлди. Шаҳобиддинга қадар боксчи Ҳасанбой Дўстматов ва оғир атлетикачи Руслан Нуриддинов Олимпиада—2016 шоҳсупасининг энг юқорисидан жой олганди.

Шунингдек, 2та кумуш ва 6та бронза медаль қўлга киритилган. Ўзбекистон делегацияси эндиликда 11та медаль билан умумий рейтингнинг 22-поғонасида жойлашди.

Иштирокини саралаш босқичидан бошлаган Шаҳобиддин Зоиров Рио—2016 даги биринчи жангида ирландиялик Брендан Ирвинни таслим этганди. У 1/8 финалда америкалик Антонио Варгасни, 1/4 финалда эса озарбайжонлик Элвин Мамишзодани турнирдан чиқариб юборди. Финал остонасида венесуэлалик Йоэл Ривасга қарши рингга кўтарилди ва рақибига ҳеч қандай имконият қолдирмаган ҳолда Ҳасанбой Дўстматов, Шаҳрам Ғиёсов ва Бектемир Мелиқўзиевлар қаторида бокс беллашувларининг финалига йўлланма олган тўртинчи ўзбекистонлик боксчига айланганди.