Япония бош вазири Синдзо Абенинг  Олимпия ўйинлари ёпилиш маросимида Nintendo компаниясининг видеоўйини қаҳрамони супер Марио либосида пайдо бўлиши барча учун кутилмаган ҳол бўлди. Ушбу томоша 2020-йили Токиода бўлиб ўтиши белгиланган навбатдаги ёзги Олимпия ўйинлари мезбонини ўзига хос таништириш бўлди. 

Quartz нашрининг ёзишича, Абэнинг қўлидаги қизил шар Япония байроғи тимсолидир.

2020-йилги ўйинлар ташвиқот ролигига биноан, Абе Рио-2016 ёпилиш маросимига жуда ҳам кечикади. Шундан сўнг, у Мариога айланиб, яшил қувурга ўзини отади ва Ернинг нариги томонида, Бразилиянинг Рио шаҳри Маракана стадионида пайдо бўлади. 

Шарҳловчиларнинг қайд этишларича, ушбу видеолавҳада мамлакатнинг ўзига хослигини кўриш мумкин. Ёпилиш маросимида Мариодан ташқари 1980-йилда Японияда ишлаб чиқилган яна бир видеоўйин қаҳрамони Pac-Man ҳам пайдо бўлган. 

Шу билан бирга, таъкидлаш керакки, келгуси Олимпиада, айнан шу ўйинлар учун махсус киритилган янги спорт турлари билан ҳам ёдда қолади. Август ойи бошида ХОҚ Олимпия дастурига скейтбординг, сёрфинг, карате, бейсбол (софтбол) ва чўққига чиқиш турларини ҳам киритди. 

Ижтимоий тармоқларнинг айрим фойдаланувчилари эса, 2020-йилга келиб бу рўйхатга Pokémon Go ўйини ҳам киритилишини айтишган