Mashhur ijtimoiy tarmoq (Instagram) bunday muvaffaqiyatga erishgan o‘n to‘qqizinchi ilova bo‘ldi.
Suratlar va videotasmalar bilan o‘rtoqlashadigan servis Google Play'ning ilovalar do‘konidan milliard martadan ortiq yuklab olindi. Tarmoqda atigi 500 mln foydalanuvchi ro‘yxatdan o‘tgani hisobga olinsa, bu juda qiziq, deya ta'kidlaydi Android Police nashri.
Ehtimol, yuklov hisoblagichi bir foydalanuvchi ilovani qayta-qayta yuklab olishi mumkinligini inobatga olmasa kerak. Masalan, foydalanuvchilar o‘z smartfoni yoki planshetlariga Instagram'ni yuklab olib, keyinroq uni o‘chirib, yana qayta yuklashadi, tizim esa buni har safar hisobga olaveradi.
Bugungi kunda Instagram tarmog‘i Mark Tsukerberg kompaniyasining Google Play'dan milliard marta yuklangan to‘rtinchi ilovasi hisoblanadi. Bunday ko‘rsatkichga birinchi bo‘lib Facebook, undan keyin WhatsApp va uchinchi bo‘lib Messenger ilovalari erishishgan.
Ijtimoiy tarmoqning bepul ilovasi umumiy hisobda o‘n to‘qqizinchi o‘rinni egalladi. Manbaga ko‘ra, yigirmanchi o‘rinda milliard marta yuklangan ilova sifatida Snapchat qayd etilishi mumkin.
