Колумбия Марказий банки машҳур ёзувчи Габриэл Гарсиа Маркес сурати туширилган пулларни муомалага киритди.

50 минг песо қийматдаги янги пуллар оч қизил тусда, деб хабар қилмоқда BBC телекомпанияси.

Маркес банкнотда икки марта тасвирланган. Унинг одатдаги портретидан ташқари, купюрада ёзувчининг атрофида капалаклар айланиб юргани ҳам акс эттирилган. Бу унинг "Ёлғизликнинг юз йили" романига ишорадир.

Янги пул бирлигининг тантанали тақдимот маросими ёзувчи туғилиб ўсган департаментнинг маъмурий маркази бўлган Санта-Марта шаҳрида ўтказилган. 

1982-йилда адабиёт соҳасида Нобель мукофотини қўлга киритган ёзувчи Маркес сирли реализмнинг асосчиларидан бири ҳисобланади. У, 2014-йили 87 ёшида ҳаётдан кўз юмган эди.