Жиззахда мустақиллик байрами арафасида “Жиззах китоб олами” маънавий-маърифий мажмуаси иш бошлади. Бу ҳақда ЎзА хабар бермоқда.

Ўзбекистон матбуот ва ахборот агентлиги ташаббуси билан барпо этилган мажмуада мамлакат нашриётларида чоп этилган 20 минг нусхадан зиёд турли китоблар сотилмоқда. Алоҳида болалар бўлими, мавзулар бўйича пештахталар, кўргазмалар ташкил этилгани харидорларга манзур бўлмоқда.

– Шаҳримизда бундай замонавий китоб савдоси мажмуасининг ишга туширилганидан хурсандмиз, – дейди Жиззах шаҳридан Дилором Расулова, – Сотувда сўнгги пайтда нашрдан чиққан барча китоблар бор экан. Айниқса, мактаб бошланиши олдидан дарсликлар, ўқув қуроллари савдоси йўлга қўйилгани болаларимизга ҳам, ота-оналарга ҳам катта қулайлик яратмоқда.