Австралиянинг Виктория штатида трюфель етиштириш билан шуғулланувчи фермер Стюарт Данбар (Stuart Dunbar)нинг айтишича, у топган қора трюфелнинг вазни 1.511 кг бўлиб, 2012 йили Францияда ковлаб олинган 1.277 кглик қўзиқориндан оғир бўлгани боис, янги жаҳон рекордини ўрнатган. 

Стюарт, трюфелнинг кўтара нархи 2,200 АҚШ доллари атрофида бўлганига қарамай, уни сотиш нияти йўқлигини таъкидлаган. 

"Мен уни тузлайман ва сақлаб қўяман", - деган Данбар Мельбурн радиосига берган интервьюсида. 

Унинг айтишича, қўзиқорин зираворлик хусусияти ва ўзига хос ўткир ҳиди, бундан ташқари танқислиги билан қадрли ҳисобланади. 

"Агар сиз таомингизга 3-5 грамм трюфелдан солсангиз, ажойиб овқатни тановул қиласиз", - дейди фермер. 

Данбарнинг махсус ўргатилган ити қўзиқоринни топганида, Данбар Мельбурндан 60 кмлар шарқда жойлашган даласида трюфелларини илиқ ҳаводан сақлаш чораларини кўраётган бўлган. 

Қора трюфел, оқ трюфелдан сўнг, дунёдаги энг қиммат қўзиқорин ҳисобланади. 

Фермернинг айтишича, у бу йил жуда кўп шундай йирик трюфелларни ковлаб олган. Албатта, бунда унинг барча шароитларни таъминлагани асос бўлган. 

"Фикримча, бунга маҳсулот етиштиришда эътиборимни табиий жараёнларга қаратганим сабаб бўлди. Мен пестицид ва ҳербицидлардан умуман фойдаланмадим", -деб таъкидлаган фермер. 

Бир пайтлар қимматбаҳо тошлар мутахассиси бўлган Данбар, трюфель қўшилган картошкали таомни тановул қилгач, ушбу қўзиқоринни етиштириш билан шуғулланишни бошлаган.