АҚШнинг Луизиана штатидаги энг йирик сув тошқини ҳудудида ҳукуматдан ёрдам сўраб мурожаат қилган кишилар сони 106 мингдан ортди. Бу ҳақда штат губернатори Жон Эдвардсга асосланган ҳолда ТАСС ахборот агентлиги маълум қилган.

Қайд этилишича, мурожаатларни қондириш учун 20 млн долларга яқин маблағ талаб этилади.

Сув тошқинлари АҚШ жанубида 11 августдан буён тўхтовсиз қуяётган жала оқибатида юзага келди. Кўплаб аҳоли пунктларида кўчалар, уй ва дўконларнинг пастки қаватлари, машиналар сув остида қолди.

Давомли ёмғирлар туфайли Луизиана штати жануби-шарқи ва Миссисипи штати жанубида кўплаб дарёлар қирғоғидан тошган.

12 август куни губернатор штатда фавқулодда ҳолат режимини жорий қилди, у 10 сентябрга қадар амал қилади.

Шу вақтгача бу табиий офат қурбонига айланган кишилар сони 13 нафар.

Тошқинлар оқибатида 40 мингга яқин уй у ёки бу даражада шикастланди. 30 мингдан ортиқ киши кўчирилди, улардан 4 мингга яқини вақтинчалик жойлаштириш марказларида қолмоқда. 

АҚШ расмийлари Луизианадаги тошқинлардан бир ҳафта ўтиб штатга 56 млн доллар ажратди.

Мазкур маблағнинг асосий қисми — 39 миллион доллардан зиёди жабрланганларни вақтинчалик уй-жой билан таъминлаш ва табиий офат ҳудудидаги уйларда биринчи галдаги таъмирлаш ишлари учун ажратилган.

Шунингдек, федерал ғазнадан ҳозиргача жабрланган аҳоли, кичик ва ўрта бизнесга кўмак учун 3,5 миллион доллар берилди. Яна 2 миллион доллар АҚШ транспорт вазирлиги томонидан тошқин ҳудудидаги автойўллар, кўприкларни тезкор таъмирлаш учун ажратилди.