Европа Россия газига қарам бўлишга барҳам беришни истаган эди, аммо расмий Анқара ва Москванинг ярашганидан сўнг, бу давом этиши аниқ бўлди, деб фикр юритади Forbes.

"Россия ва Туркиянинг дўстона муносабатларни тиклаши Европанинг яқин келажакда Россия табиий газига эҳтиёжини сақлаб қолади", — деб таъкидлайди мақола муаллифи Эллен Р. Уолд.

Унинг ёдга олишича, икки мамлакат ўртасидаги алоқалар, турк учувчисининг Сурия осмонида Россиянинг бомбардимончи самолётини уриб туширганидан сўнг ёмонлашган эди. Бунга жавобан, Россия бир қатор кескин чораларни қўллаган, шу жумладан Туркия орқали ўтадиган 900-кмлик газ қувурини барпо этишни музлатган эди. 

Европа ўз навбатида буни энергиянинг бошқа манбаларига ўтиш ва шу билан Россия газига бўлган қарамликка барҳам бериш учун ажойиб имконият сифатида қабул қилди. 

Бироқ, геосиёсий вазият жуда ҳам тез ўзгаришини Россия ва Туркиянинг ярашгани ҳам исботлайди. Қайта тикланган иттифоқ Москвага ўз энергетика режаларини амалга оширишда ёрдам бериши тайин. 

Муаллифнинг қайд этишича, Европа энергиянинг бошқа манбалари, хусусан Американинг суюлтирилган газига ўтиш имкониятига ҳозир ҳам эга. Бироқ, Россия газига муқобил барча манбалар қўшимча харажатларни талаб қилади. 

"Гарчи Европа, Россиянинг геосиёсий таъсиридан қутилишни истаган тақдирда ҳам, унинг қиммат бўлмаган табиий газига ўрганиб қолган. Шу боисдан, Европа бошқалар каби осонгина қўлга кираётган маҳсулотдан воз кеча олмайди", — дея хулоса қилади муаллиф.