Риодаги Олимпиаданинг кумуш медали соҳиби, польшалик спортчи Петр Малаховский ўз медалини кам учрайдиган касалга учраган боланинг даволанишини тўлаш учун сотиб юборди.  

"Олимпиадада ғолиб бўлиш ҳар бир спортчининг орзуси. Албатта энг қадрлиси олтин медалдир. Бироқ мен қўлимдан келганини қилдим. Афсуски, бу гал мен олтинга бир қадам ета олмадим. Бироқ тақдир менга кумуш медалимнинг қадрини оширишга имкон берди. 

Олимпиададан кейин бир аёл фарзандига ёрдам бериш илтимоси билан менга хат ёзди. Олек ўз ҳаётининг ярмидан кўпроғи давомида кам учрайдиган касаллик – кўз саратони билан курашиб келади.

Мен кумуш медалимни аукционда сотдим. Олинган барча пулни боланинг даволаниши учун юбордим", деб ёзди Малаховский фейсбукда.

Польшалик спортчи ўз медалини диск улоқтиришда қўлга киритганди. У дискни 67,55 метрга улоқтирган. Олтин медаль эса германиялик спортчи Кристоф Хартингга насиб қилганди.