Туркия қуролли кучларининг Сурия шимолидаги ҳарбий амалиётлари ИШИД томонидан мавжуд хавф тўла бартараф этилмагунича давом эттирилади. Бу ҳақда мамлакат Ички ишлар вазири Эфқан Ала маълум қилган.

"Биз бу амалиётни ўтказиш қарорини коалиция кучлари билан келишган ҳолда қабул қилдик. Мақсадимиз - Сурия мухолифатига кўмак кўрсатиш. Гап Туркия учун мавжуд очиқдан-очиқ хавф тўғрисида бормоқда. Кеча бизнинг ҳудудимизга Сурия ҳудудидан 9та снаряд отилди. Бугун эса яна битта. Биз бу вазиятга ортиқ чидаб турмоқчи эмасмиз ва чегараларимиз хавфсизлигини таъминлаш учун барча зарур чораларни қўллаймиз. Ҳудудда хавфсизликни таъминлаш чоралари амалга оширилмоқда, шу вақтгача 6та қишлоқ аҳолиси эвакуация қилинди", деган у.

Бугун Туркия томонидан олиб борилаётган Сурия шимолидаги Жараблус вилоятини ИШИД жангариларидан тозалаш операцияси доирасида турк махсус бўлинмалари Сурия ҳудудига кирди.

Турк қўшинларининг қуруқликдаги операцияси ҳали бошланмаган, бироқ чегарада шунга тайёргарлик кўрилмоқда.

Бундан олдинги хабарларда Туркия артиллерияси халқаро коалиция билан биргаликда ўтказилаётган операция давомида Жараблусга зарбалар бергани ва авиапарвозларни амалга оширгани айтилганди. Артиллерия Жараблусдаги 63та маррага жами 224 марта зарба берган.