Ma'lumki, har yili dunyoning turli yirik shaharlarida avtomobilsozlik gigantlari ishtirokida o‘ziga xos ko‘rgazmalar tashkil etiladi. Jyeneve, Detroyt, Frankfurt, Parij avtoshoularini ko‘pchilik intiqlik bilan kutishi shubhasiz. Ayrim avtokompaniyalar o‘zlarining yangi ishlanmalarini ma'lum bir ko‘rgazmada namoyish etishni oldindan belgilab ham qo‘yishadi. Rossiya poytaxti Moskva shahrida tashkil etiladigan an'anaviy ko‘rgazma ham shular jumlasidan. Biroq...
Bu yil mazkur avtosalonda ishtirok etishni istagan kompaniyalar soni besh martaga qisqargani, ko‘rgazmaga tashrif buyurgan tomoshabinlar sonida ham aks etgan.
G‘arbiy Yevropa va Yaponiya avtomobilsozlik kompaniyalari Moskvada ish boshlagan xalqaro avtomobil ko‘rgazmasida ishtirok etishni turli vajlar bilan maqsadga muvofiq emas, deb topgan. Bu esa, albatta, Lada, Mercedes-Benz, Hyundai va Xitoy brendlari, shu jumladan O‘zbekistonning “Ravon” brendi uchun o‘z mahsulotlarini yaxshiroq tanishtirish borasida ulkan imkoniyat bo‘ldi.
Xo‘sh, shunday ekan, kim nima keltirdi?
Moskva-2016 avtoko‘rgazmasida o‘z tarixida eng yirik ekspozitsiyaga ega bo‘lgan «AvtoVAZ» konserni bu yerga 19 mashinasini keltirdi. Kompaniya o‘zining yangi mahsulotlari Vesta sedani va Xray krossoverini boshqarib ko‘rish imkonini taqdim etdi. Bunda, X uslubida ishlab chiqilgan ixcham va qulay XSode krossvori prototipi ko‘pchilikda qiziqish uyg‘otdi. Vesta Cross sedani va universali, Xray Cross kontsepti, Vesta va Xray modellarining sport rusumlari ham mehmonlar e'tiboriga havola etilmoqda.
Germaniyaning Mercedes-Benz kompaniyasi g‘arb avtosanoatining yagona namoyandasi bo‘ldi, deyish haqiqatga mos keladi. U, avtosalonda g‘arb avtomobilsozlari uchun ajratilgan hududni to‘liq egallab olishni maqsad qilgan shekilli, ko‘rgazma zallaridan birini to‘liq ijaraga olib 33 dona avtomobilini (xususan, 3ta Smart va bitta Formula 1 chempionlik bolidi) joylashtirgan. Bu burchakdagi eng asosiy voqea GLC kupe-krossoverining taqdimoti bo‘ldi. Mercedes-AMG sportkarlari: S 63 kabrioleti hamda AMG Sport E 43, GLC 43 sport mashinalarining yangi namunalari, C 43 kabrioleti va SLC 43 rodsteri tomoshabinlar qiziqishini uyg‘otmoqda.
Janubiy Koreyaning Hyundai kompaniyasi o‘zining asosiy e'tiborini Sankt-Peterburgda ishlab chiqarilishi rejalashtirilgan yangi ixcham krossoveri Creta modeliga qaratgan.
Shvetsiyaning Volvo kompaniyasi Yevropadagi Jyeneva avtoko‘rgazmasidan boshqasida ishtirok etmaslikka qaror qilgan. Biroq, shvedlar Moskvaga kompaniyaning yangi mahsuloti S90 sedanini keltirishga ko‘mak berishdi.
Xitoy bu ko‘rgazmada o‘zining 4ta avtokompaniyasi bilan ishtirok etayapti.
Dongfeng Motor (PSA Peugeot Citroen kompaniyasi sarmoyadori) PSA Peugeot Citroen platformasi negizida ishlab chiqilgan A9 sedanini keltirishdi. Bu sedan esa, kompaniyaning uqdirishicha, «Dongfeng Motor korporatsiyasining oliy toifadagi birinchi mahsulotidir».
Xitoyning Shangan kompaniyasi Raeton sedani, CS75 va CS35 krossoverlarini keltirgan.
Xitoyning yana bir avtomobilsozlik sanoati vakili FAW Rossiya bozori uchun mo‘ljallangan ikkita modeli: FAW Besturn X80 hamda FAW D60 krossoverlarini namoyish etdi.
Geely kompaniyasi (Xitoy) Moskva avtosaloniga tashrif buyurganlar e'tiboriga Geely Emgrand GT sedanini havola etdi. Bundan tashqari, Geely (NL-3) krossoveri, Geely Emgrand Cross ixcham krossoveri, Geely GL (FE-5) sedani, yangi avlod Emgrand X7 krossoveri ham kompaniya burchagidan o‘rin olgan.
Moskva avtosalonida bo‘lib o‘tgan muhim taqdimot marosimlaridan biri O‘zbekistonning «O‘zavto» (Ravon brendi) burchagida bo‘lib o‘tdi, desak xato qilmagan bo‘lamiz. Bu yerda, o‘zbek savdo belgisining yangi mahsuloti R3’ning taqdimoti bo‘lib o‘tdi va R4 tanishtirildi.
