Лангарчўп билан баландликка сакровчи россиялик спортчи, Риодаги Олимпиадага қўйилмаган Елена Исинбаева спорт фаолиятини қайта бошлаши ва 2020 йилги Токио Олимпиадасида иштирок этиши мумкинлигини айтди. Спортчи бу ҳақда "Спорт-Экспресс" нашрига берган интервьюсида айтиб ўтди.

"Иложсиз нарсанинг ўзи йўқ. Мисол учун, испаниялик спортчи Рут Бейтиа 37 ёшида Риода баландликка сакрашда ғолиб бўлди", деб айтди Исинбаева.

Спортчи бу масала бўйича якуний қарорни қачон қабул қилиши ҳақида аниқлик киритмади ва ҳозирча у бутун эътиборини бошқа ишга қаратганини айтди.

"Менинг ҳаётим ўзгарди. Токиодаги Олимпиадага яқин у қандай бўлишини вақт кўрсатади. Қатъиян "Йўқ" деб айтмайман, бироқ ҳеч нарса ҳам ваъда қилмайман", деб қўшимча қилди Исинбаева. 
 
Исинбаева 19 августда спорт фалоятини тугатишини маълум қилганди. У 2004 ва 2008 йиллардаги Олимпиадалар олтин медали соҳибаси ҳисобланади.