24-август куни Италиянинг марказий ҳудудларида юз берган кучли ер силкинишидан кўрилган иқтисодий талофат, дастлабки ҳисобларга кўра, 1 млрд доллардан ошиб кетган, суғурта қопламалари 500 млн доллардан ортади, дейишмоқда KAC экспертлари. Бироқ, якуний зарар миқдори бундан кўп бўлиши аниқ. 

Bloomberg агентлигининг хабарига кўра, суғурта соҳасининг зарари 2009-йилдаги зилзилада кўрилганидан ортиқ бўлиши мумкин. Ўшанда, Generali 100 млн евро тўлаган эди. Аxa - 41 млн евро, Hannover Re - 11,2 млн евро, Munich Re - 23 млн евро маблағини суғурта тўловларига сарфлаганди.

Шу билан бирга, бу ҳол аксинча бўлиши ҳам эҳтимолдан ҳол эмас. Generali суғурта компанияси маълумотларига кўра, Италиянинг марказий туманларидаги тураржойларнинг атиги 20 фоизи суғурталанган, холос. 

24-август, чоршанбага ўтар кечаси Италия марказида Рихтер шкаласи бўйича 6,2 баллик ер силкиниши юз берди. Зилзила оқибатида Италиянинг ўтган йилги энг чиройли шаҳри деб топилган Аккумоли, Поста ҳамда Аркуата-дель-Тронто шаҳарлари вайрон бўлди. 

Қурбонлар сони 250 нафарга яқинлашган. Қутқарув ишлари давом эттирилмоқда.