Auto.ru сайтида Россия ҳукумати томонидан Рио Олимпиадасида олтин медаль қўлга киритган россиялик спортчиларга совға қилинган BMW X6 автомобили сотувга қўйилди. Оқ рангдаги машина 4 670 000 рублга сотилаётгани ҳақидаги эълон 25 августда пайдо бўлди. 

Эълонда машина 2016 ишлаб чиқарилгани ва бор-йўғи 1 км йўл босиб ўтгани айтилган. "Машина шахсан Россия президенти В.В.Путин томонидан берилган. Рио Олимпиадасидаги ғалаба, аниқроғи олимпиада олтин медали учун!!! Машина янги! xDrive 3,5 бензинли, 306 от кучи, luxury комплектациясида», дейилган эълонда.

Машина эгаси манфаатларини билдирувчи сотувчининг "Р-Спорт" агентлигига маълум қилишича, автомобиль Россия синхрон сузиш терма жамоаси аъзоларидан бирига тегишлидир.  

Маълум қилинишича, автомобиль унинг эгаси машина ҳайдашни билмаслиги сабабли сотувга қўйилган.

25 августда Кремлда олимпиячиларни давлат мукофотлари билан тақдирлаш маросими бўлиб ўтди. Риода олтин медаль қўлга киритган спортчиларга BMW X6, кумуш медаль соҳибларига BMW X4 ва бронза медаль соҳибларига BMW X3 машиналари совға қилинган. Калининграддаги "Автотор" заводида йиғилган машиналар Россия олимпиячиларини қўллаб-қувватлаш жамғармаси томонидан тақдим қилинган.

Риода гуруҳ бўлиб синхрон сузишда Наталья Ишенко, Светлана Ромашина, Александра Пацкевич, Светлана Колесниченко, Мария Шурочкина, Влада Чигирева, Алла Шишкина, Гелена Топилина и Елена Прокофьева олтин медаль ютгандилар.