БМТда Франция давлат кенгашининг мусулмон аёллар чўмилиш кийими – буркини кийишга тақиқловни ноўрин деб тан олгани маъқулланди. Бу ҳақда БМТ бош котибининг расмий вакили Стефан Дюжаррик маълум қилди. 

26 августда Франциядаги олий маъмурий инстанция ҳисобланадиган Франция давлат кенгаши Вильнев-Лубе курорти мэрияси томонидан буркини кийишга қиритилган тақиқловни ноўрин деб топди. Давлат кенгашининг фикри бошқа шаҳарлардаги шундай қарорлар юзасидан шикоятларнинг судлар томонидан кўриб чиқилишида инобатга олинади. Ҳозирда эса буркини тақиқланган шаҳарлар 30 га яқинни ташкил қилмоқда.

"Биз суднинг қарорини маъқуллаймиз", деб айтди Дюжаррик журналистларга ва "инсон қадр-қиммати ҳурмат қилиниши зарурлигини" таъкидлаб ўтди. 

Аввалроқ Guardian нашри ўз таҳририятига келиб тушган суратларга асосланиб, Ниццадаги пляжда полициячилар дам олаётган мусулмон аёлни буркинининг тепа қисми – кўк рангдаги, узун енгли туникани ечишга мажбур қилганларини маълум қилганди.  

Шу билан бирга Сиско шаҳри мэри Анж-Пьер Вивони давлат кенгаши қарорига қарамасдан, маҳаллий пляжларда буркинини кийишга киритган тақиқловини бекор қилмоқчи эмаслигини айтди.

Бутун танани ёпиб турувчи буркинини кийишга тақиқлов Франциянинг Ницца, Канн, Ментон, Сен-Лоран-дю-Вар, Сиско, Ле-Туке, Лекат, Уа-Плаж, Вильнев-Лубе, Болье-сюр-Мер ва Манделье-ла-Напуль шаҳарларида амал қилмоқда. Бу тақиқловга бўйсунишдан бош тортган уч аёл 38 евро миқдорида жаримага тортилган.