Хитойнинг икки фуқароси ўзига тўқ аёлдан 47 млн юан (7 млн доллар) ундиришда айбдор деб топилди. Бу ҳақда South China Morning Post нашри хабар берди. 

Чжэн Сюэцзюй исмли аёл 2012 йилда Шэньчжэнь шаҳрида банк очмоқчи бўлган. Фирибгарлардан бири ўзини аёлга 300 йил аввал ўлган, Цин сулоласидан бўлган Цяньлун императори сифатида таништирган. У аёлга "ҳаёт эликсирини" ичиб тирилгани ва ўз бойлигини қайтариб олмоқчилигини айтган. Унинг шериги эса ўзини молиячи деб атаб, аёлни "императорнинг музлатилган пулларини" қайтара олишда ёрдам бера олишига ишонтирган.

Шундан кейин фирибгарлар уларга Тайбэйдаги императорлик саройи музейи коллекциясига кирувчи "жадеит карам" – яшил рангдаги маъдан – жадеитдан ясалган ҳайкалчани сотиб олиш учун 2,22 млн юан (330 минг доллар) кераклигини айтишган. 

Бундан кейин аёл фирибгарларга "даромадли" молиявий схемага 15 млн юан (2,2 млн доллар) ва Шэньчжэндаги технологик фирмага инвестиция сифатида 30 млн юан (4,5 млн доллар) берган.

Нашрнинг таъкидлашича, фирибгарлар ундирилган пулларнинг катта қисмини кўчмас мулк, машина ва дори-дармонлар сотиб олиш учун ишлатган.

Цяньлун императори Цин сулоласининг олтинчи маньчжур императори бўлган ҳамда Хитойни 1736 йилдан 1795 йилгача бошқарган.