АҚШлик сиёсатчи Жон Маккейн мураккаб праймеризлар ва ноябрдаги янада мураккаброқ сайловлар арафасида, 29 августда 80 ёшини нишонлади. Маккейн АҚШ сенатига олтинчи маротаба олти йиллик муддатга сайланишга умид қилмоқда.

30 августда Маккейн Аризонада праймеризда иштирок этади, унда сиёсатчига Келли Уорд рақиблик қилади. Маълумотларга кўра, сўровномалар натижасига кўра, Маккейн Уордни анча катта фарқ билан ортда қолдирмоқда, бироқ Уорд уни пенсияга жўнатмоқчи. 

"Жон Маккейн ўз ишини яхши бажара олмаяпти. У заиф бўлиб қолган. У қариб қолди. Унга бахтли туғилган кун тилаб қоламан. Душанба куни у 80 ёшга тўлади ва мен унга туғилган кунига энг яхши совға – пенсия туҳфа қилмоқчиман", деб айтди Уорд.

Маккейн праймеризда ютса, 8 ноябрдаги умумий сайловларда вакиллар палатаси депутати Энн Киркпатрик билан курашиши керак бўлади.

Маккейн АҚШнинг энг тажрибали сенаторларидан ҳисобланади, у Россияга қарши қарашлари билан танилган. У биринчи бор 1987 йил сенатор этиб сайланган. 2008 йилда Республикачилар партиясидан президентлик сайловларида иштирок этган, бироқ Барак Обамага ютқазиб қўйган.