АҚШ Арктикани ўзлаштиришга тайёргарлик борасида Россиядан сезиларли даражада ортда қолмоқда. Америка генерали Пол Сельванинг фикрича, айни шу минтақа глобал рақобатнинг навбатдаги майдони бўлади, деб ёзади Business Insider.

Арктика музликларининг эриши янги транспорт йўналишларини очиш баробарида жаҳоннинг шу пайтга қадар аниқланмаган нефть ва табиий газ захираларининг 22 фоизини ўзлаштириш имконини тақдим этади. Бироқ, Россия янги имкониятлардан фаол равишда фойдаланаётган бир вақтда, АҚШнинг бу минтақадаги иштироки унчалик ҳам сезиларли кўзга ташланмаяпти. 

"Биз, Арктикада қандайдир кўринишда пайдо бўлиш бўйича жисмоний имкониятларга эга эмасмиз. Биз бунга жиддий эътибор беришимиз керак", — деган Сельва.

Мақолада қайд этилишича, бугунги кунда Россия ихтиёрида 20дан ортиқ музёрар кемалар мавжуд, АҚШда эса атиги иккита шундай кема бор. 

"Бизга, биттами... ўн иккитами... нечта музёрар кемалар зарурлигини мутахассислар ҳал қилишсин. Бироқ, стратегик нуқта-и назардан олиб қараганда, Арктикадаги ўзгаришлар жараёнини тушуниш ва бошқариш, кузатув олиб бориш имкониятига эга бўлиш бизнинг манфаатларимиз, шунингдек, Арктика билан чегарадош мамлакатлар, хусусан Россия манфаатлари доирасига киради. Тўғри, музёрарлар масалани ҳал қилмайди, бироқ, улар мазкур муаммони ҳал этишнинг бир қисми бўлиши мумкин", — дея таъкидлаган Америка генерали. 

Шунга қарамай, дейилади мақолада, сўнгги вақтларда бу борада кўп нарса ўзгаргани йўқ. 

Бир йилгина муқаддам, АҚШ соҳил қўриқлаш хизмати коменданти Пол Цукунфт, "АҚШ Россия бўлган лигада эмас. АҚШ умуман бу ўйинда эмас", деган эди.