Россия Федерацияси бош вазири ўринбосари Ольга Голодец, Россия ва Ўзбекистон ўртасида президент Ислом Каримовга тиббий ёрдам кўрсатиш бўйича келишув борлиги, аммо расмий Тошкент бу борада Москвага мурожаат қилмаганини маълум қилган.

“Бизда улар билан ўзаро умумий ёрдам кўрсатиш бўйича келишув имзоланган. Бизга агар бошқа давлатда бўлмаган мураккаб технологик операцияларда ёрдам сўраб мурожаат қилишса, ёрдам кўрсатамиз. Аммо бундай расмий мурожаат бўлмади”, дея таъкидлаган Голодец чоршанба куни журналистларга.

"Интерфакс" агентлиги хабарига кўра, журналистлар Ўзбекистон ҳукумати Россияга Ислом Каримов даволаниши юзасидан тиббий ёрдам ёки маслаҳат сўраб мурожаат қилган-қилмагани ҳақида савол берганди.

28 август куни ЎзА агентлиги Вазирлар Маҳкамасига асосланиб президент Ислом Каримов стационар даволанишда экани ҳақида хабар берди.

29 август куни президентнинг иккинчи қизи Лола Каримова-Тиллаева ижтимоий тармоқлардаги саҳифасида отаси инсульт туфайли шифохонада экани, эндиликда аҳвол барқарорлашгани ҳақида маълум қилди. 

Бугун, 31 август куни эса у Ўзбекистон халқини Мустақилликнинг 25 йиллиги билан муборакбод этди ва халқнинг дуолари ва яхши ниятлари ортидан президентнинг саломатлиги яхшиланиб бораётгани ҳақида билдирди.