Ватанимиз мустақиллигининг йигирма беш йиллиги арафасида нуроталик Ҳурой момо Эргашеванинг хонадони ҳар қачонгидан ҳам гавжум. Президентимизнинг жорий йил 24 августдаги фармонига мувофиқ “Шуҳрат” медали билан тақдирланган 104 ёшли Ҳурой момони мустақиллик байрами билан табриклаш ва давлатимизнинг юксак мукофотини топшириш учун Навоий вилояти ҳокими Э.Турдимов бир гуруҳ фаоллар ҳамроҳлигида ушбу хонадонга келди. 

 Ёши 104 да бўлса-да, момо тетик, бардам, фикри теран. Гурунгларда бугунги фаровон кунлар шукронаси, тинчлигимизнинг қадрига етиш, уни асраб-авайлаш зарурлиги ҳақида сўзлайди.

 Икки ўғил, икки қизни тарбиялаб вояга етказган момо бугун 18 невара, 22 чевара ардоғида яшамоқда.

 – Эҳ-ҳе, қанча-қанча одамлар бугунгидек фаровон ва тўкин кунларни орзу қилиб ўтиб кетди. Ёшлигимизда мабодо биров ҳали шундай-шундай кунларда яшайсан, деса, мен ҳам ишонмасдим, – дейди Ҳурой момо. – Яратганга шукр, мустақиллик шарофати ва Юртбошимизнинг оқилона сиёсати туфайли шу кунларга етдик. Болалару невара-чевараларнинг тўкин, бахтли ҳаётидан гўё яшариб кетаман. Ютуғидан севинаман, кўнглим тоғдек кўтарилади. Биз кўрган қора кунлар уларнинг бошига тушмаслигини Яратгандан сўрайман. Давлатимиз раҳбари бундай юксак мукофот билан тақдирлаганидан хурсанд бўлдим. Биз, кексаларга кўрсатаётган улкан эътибори ва ғамхўрлигидан миннатдормиз. Юртимиз доимо тинч, ҳаётимиз тўкин-сочин бўлсин.