Туркиянинг Европа ишлари бўйича вазири Умар Челик Германиянинг Европа Комиссиясидаги вакили Гюнтер Эттингернинг баёнотига муносабат билдириб, уни «маданий ирқчилик», деб атади. Эттингер, Туркия Эрдўған даврида ЕИга аъзо бўлиши борасида шубҳа билдирган эди, деб хабар қилмоқда Anadolu агентлиги.

Хабарларга кўра, ЕИнинг рақамли иқтисодиёт ва жамият масалалари бўйича комиссари Гюнтер Эттингер Bild нашрига берган интервьюсида, Туркиянинг ЕИга аъзо бўлиш шартларидан бири Ражаб Тоййиб Эрдўғаннинг президентлик лавозимидан кетиши эканини билдирган эди. 

«Эҳтимол, бу масала Эрдўғандан кейин долзарб мавзуга айланар», — деб баёнот берган Эттингер.

У, шунингдек, яқин орада Туркияга визасиз тартиб жорий қилинмаслигини ҳам билдирган. 

Июль ойи охирларида, Европарламент Туркияга визасиз тартибни тақдим этишга қарши овоз бериши мумкинлиги айтилганди.