Халқаро футбол федерациялари уюшмаси (ФИФА) 13-14 октябрь кунлари Цюрихда 2026 йилги жаҳон чемпионатида 40та терма жамоа иштирок этиши масаласини кўриб чиқади. Лойиҳага кўра, ЖЧ-2026 турнирига 3 мамлакат мезбонлик қилиши кўзда тутилган. Бу ҳақда ташкилот президенти Жанни Инфантинога асосланиб The Washington Post хабар тарқатган.

«13-14 октябрь кунларидаги йиғилишда бу икки мавзу муҳокама қилинади. Футбол учун фойда берадиган ислоҳотлардан тийилмаслик керак. Нима бўлишини кўрамиз, лекин КОНКАКАФ (Шимолий ва Марказий Америка ҳамда Кариб ҳавзаси мамлакатлари футбол конфедерацияси) анчадан буён жаҳон чемпионати ўтказиш ҳуқуқини олмади.  Менимча, ҳозирда барчасининг имкони бор. Мундиалда 40та жамоа иштирок этиши бўйича фикрим ўзгармаган», — деган Инфантино.

У аввалгиларига қараганда 8та терма жамоа кўп қатнашган 2016 йилги  Европа чемпионатини бундай лойиҳанинг ишончни оқлашига намуна сифатида келтириб ўтган.

«Бундай воқеалар шунчаки мусобақадан ҳам кўра кўпроқ мавқега эга, бу ижтимоий лойиҳалар бутун жаҳон учун мўлжалланган», — дея қўшимча қилган ФИФА раҳбари.

2026 йилги мундиални қабул қилишга АҚШ, Канада ва Мексика биргаликда ариза бериши кутилмоқда. Инфантино ФИФА президентлигига сайланишидан олдин ҳам сайловда ғалаба қозонса жаҳон чемпионати иштирокчилари сонини 32тадан 40тага оширишини билдирганди.

2018 йилги Россия ва 2022 йилги Қатар мундиалида иштирокчилар сони 32талигича қолади.

Манба: Tribuna.uz