Германия канцлери Ангела Меркель Россия ва АҚШ Ҳалабда тинч аҳолининг ўлимига сабаб бўлаётган бомбардимонларни ва отишмаларни зудлик билан тўхтатишга чақирди.

"Мен фақат умид қиламанки, Россия ва АҚШ томонлари шифокорларни ва тиббиёт муассасаларини ўққа тутишни бас қилиш бўйича келишувга эришади. У ердаги кишилар даҳшатли даражада азоб чекишмоқда. Буни оқлаб бўлмайди", - деган канцлер.

Шу билан бир вақтда суриялик кўнгиллилар Башар Асад армиясини Ҳалаб яқинида кимёвий қурол ишлатишда айблаган. 100дан ортиқ киши Ҳалаб яқинида хлор қўлланиши оқибатида заҳарланиб, шифохонага ётқизилган.

Ҳалабда 250 мингдан ортиқ киши жангарилар томонидан эгалланган ҳудудларда қамалда қолган.

Хитойдаги G20 саммити вақтида икки томон ўртасида бу бўйича сулҳ тузилиши кутилганди. Лекин якунда Вашингтон ва Москва ҳозирча келишувга эришмагани маълум бўлди.

Июль ойидан буён бу борада иш олиб борилмоқда. АҚШ Давлат котиби Жон Керри Москвага келган ва ўз таклифини билдирганди. Унга кўра, Ҳалабдаги кишиларга инсонпарварлик ёрдамлари етказиб бериш учун Сурия армиясини бу ҳудуддан олиш кўзда тутилган.