Москвада 2018 йилда ВДНХнинг (кўргазма мажмуаси) жанубий қисмида Европадаги энг баланд томоша ғилдираги қуриш режалаштирилмоқда. Кўргазма мажмуаси матбуот хизматида маълум қилинишича, лойиҳа "Регионы" компаниялар гуруҳи томонидан молиялаштирилади ва қурилади. 

Томоша ғилдирагининг баландлиги 140 метрни ташкил қилади ва унга кетадиган дастлабки харажатлар 12 млрд рублга баҳоланмоқда. Майдони 6,9 гектарни ташкил қиладиган мажмуа ВДНХнинг жанубий кириш қисмида жойлашади, бу ерда кенг, усти ёпиқ променад орқали сайр қилиш, кинотеатр-мультиплексга ташриф буюриш ҳамда ресторан ва кафеларда тамадди қилиш мумкин бўлади.

Улкан томоша ғилдираги 30 та ёпиқ, жумладан 3 та юқори шинамликка эга бўлган кабинадан иборат бўлади, ҳар бир кабина 20 киши мўлжалланади. Кабинанинг ойнаванд деворлари орқали 360 градуслик манзара очилади. Ташриф буюрувчиларга шинам бўлиши учун кабиналар ҳавони совитиш ва иситиш тизими билан жиҳозланади. Бунинг эвазига ундан йил бўйи исталган ҳавода фойдаланиш мумкин бўлади. 

Томоша ғилдираги бир вақтда 600 кишини сиғдира олади, унинг бир тўлиқ айланиб чиқиши учун 25 дақиқада талаб этилади. Аттракцион бир соатда 1620 кишига хизмат кўрсата олади. Меҳмонларга ташриф олдидан аттракционнинг яратилиши ҳақида 4D-фильм намойиш қилинади. Кабиналарда меҳмонларнинг исталган саволига жавоб беришга тайёр бўлган экскурсоводлар бўлади.