Америка истеъмол маҳсулотлари хавфсизлиги бўйича комиссияси, мамлакат ҳудудида сотилган бир миллионга яқин Samsung Galaxy Note 7 смартфонларини, уларнинг қизиши ва натижада аккумуляторларининг портлаши эҳтимоли бўлгани сабаб қайтариб олишга буйруқ берган.

Баёнотда айтилишича, бу қарор шу йилнинг 15 сентябригача сотилган Galaxy Note 7 мобиль қурилмаларига тегишлидир. Умуман, батареялар қизиб кетиши билан боғлиқ 92 та ҳолат қайд этилган бўлиб, шундан 26тасида телефон эгаси куйганидан арз қилган. 55та ҳодисада мол-мулкка талофат етган. 

"Истеъмолчилар чақириб олинган Galaxy Note 7 телефонларидан фойдаланишни зудлик билан тўхтатишлари керак", - дейилади хабарда. Уларга Samsung қурилмаси харид қилинган дўконга мурожаат қилиш ҳамда бошқа батарея ўрнатилган худди шундай телефонга алмаштириб беришни сўраш тавсия қилинган. 

Аввалроқ, АҚШ федерал авиация бошқармаси хавфсизлик нуқтаи-назаридан самолётлар бортида Galaxy Note 7 телефонларини ишлатишни тақиқлаган эди.