Қирғизистон ташқи ишлар вазири Эрлан Абдилдаевнинг баёнот беришича, МДҲни замон талабларига мослаштирган ҳолда унинг самарадорлигини ошириш бўйича энг қийин илк қадамлар ташланган. У, Ҳамдўстлик мамлакатлари ташқи ишлар вазирлари Кенгашининг Бишкекда бўлиб ўтган йиғилиши якунида шундай фикрни билдирган. 

"Қирғиз Республикасининг МДҲга раислик қилган даврида фаол муҳокама этилган масалалардан бири, Бишкек ташаббуси билан илгари сурилган МДҲни ислоҳ қилиш ва замон талабларига мослаштириш масаласи бўлди. Натижада, аниқ таклифлар ишлаб чиқилди. Шундай қилиб, айтиш мумкинки, ҳамдўстлик фаолиятининг таъсирчанлигини ошириш борасида илк қадам қўйилди", — деган Абдилдаев.

Унинг сўзларига кўра, МДҲ давлат раҳбарларининг Бишкек саммитида шунчаки концептуал мазмунга эга масалалар қўйилмайди. 

МДҲ ижроияя қўмитаси раиси Сергей Лебедев ўз навбатида кенгаш амалий руҳда бўлиб ўтганини қайд этган. 

МДҲ ташқи ишлар вазирлари Кенгашининг мажлиси якунига кўра, Ҳамдўстлик давлат раҳбарлари саммити учун 16та ҳужжат тайёрланган.