"Формула-1"нинг собиқ пойгачиси Алессандро Дзанарди Риодаги Паралимпиадада иккинчи олтин медални қўлга киритди.

Дзанарди 17 сентябрда қўл велосипедлари пойгасида Италия терма жамоаси таркибида биринчи бўлди. Унинг жамоаси 22 км лик масофада ўзини тақиб қилаётганларни 47 сония ортда қолдирди. 

Бунгача италиялик индивидуал пойгаларда олтин ва кумуш медалларни қўлга киритганди. Дзанарди Лондондаги ўйинларда ҳам шундай кўрсаткичга эришганди ва эндилида унинг ҳисобида 4 та олтин ва иккита кумуш медаль бўлди. 

Дзанарди "Формула-1"нинг турли жамоалари собиқ пойгачиси ҳисобланади. У пойгада 1990-йилларда иштирок этган, икки марта CART серияси чемпиони бўлган. 2001 йилда CART серияси пойгаларидан бирида италияликнинг болидига бошқа пойгачи болиди келиб урилган ва унинг болидини иккига бўлиб ташлаган. Бунинг оқибатида италияликнинг иккала оёғини олиб ташлашга тўғри келган.