Австралия Мудофаа вазирлиги мамлакат қуролли кучлари самолётлари АҚШ бошчилигидаги ҳарбий коалиция таркибида Сурия ҳукумати ҳарбийлари устида хатолик туфайли амалга оширилган амалиётда иштирок этганини тан олди.

«Австралия самолётлари коалициянинг ушбу ҳарбий амалиётида иштирок этган самолётлар қаторида бор эди. Лекин биз суриялик ҳарбийларни қасддан ўққа тутганимиз йўқ. Бу ҳужум туфайли ҳалок бўлган суриялик ҳарбийларнинг ўлими учун ҳамдардлик билдирамиз», – дея Австралия мудофаа вазирлиги баёнотини келтирган АВС.

Сурия шарқида, Дайр аз-Заврда хатолик туфайли берилган зарбалар туфайли турли манбаларга кўра 62 нафардан 83 нафаргача бўлган суриялик ҳарбий ҳалок бўлди, 100 нафардан ортиғи яраланди.

Бундан олдинроқ, АҚШнинг БМТдаги доимий вакили Саманта Пауэр Россия ТИВ расмий вакили Мария Захарованинг Сурия армиясига қаратилган зарбалар Вашингтон ИШИДни ҳимоя қилаётгани тўғрисида хулосага келишга сабаб бўлаётгани ҳақидаги баёнотига кескин муносабат билдириб, Россия томонини Сурия масаласидаги келишувга риоя этмаётганини қўшимча қилиб ўтганди.