"Хитой кўчмас мулк қироли" Ван Цзяньлиннинг 28 ёшли ўғли Ван Сиконг ўзининг ити - Коко учун саккизта iPhone 7 смартфонини харид қилди. Бу ҳақида Daily Mail маҳаллий ОАВга асосланиб, хабар берди

Weibo ижтимоий тармоғида Коконинг шахсий аккаунти мавжуд бўлиб, уни 1,9 миллион фойдаланувчи кузатади. iPhone 7 сотувларининг илк кунида унинг саҳифасида смартфон қутиларининг сурати пайдо бўлган. 

Бир йил аввал Ван Сиконг ити учун Apple'нинг ҳар бири 12 минг доллар қийматга эга икки тилла соатини харид қилганди. 

"Менинг икки янги соатим бор! Аслида менга тўртта соат керак, чунки тўртта оёғим бор. Бироқ бундай бўлса, ҳаддан ошган бўлардим, шу боис иккита билан чекланишга қарор қилдим, бу мен учун айни муддао. Сенда ҳам шундай соат борми?"
Weibo'даги сурат остида қолдирилган ёзувдан

Ўша ойдаёқ Ван Сиконг итига Fendi'дан пушти рангли сумка ҳадя қилди. 

Ван Сиконг омадли ишбилармон ҳамда Хитойнинг 30 ёшгача бўлган энг бадавлат тадбиркорларидан биридир. У Сингапур ва Лондонда таҳсил олган. Ван Сиконг отаси - 24,2 миллиард доллар давлати билан Forbes бўйича Хитойнинг энг бадавлат кишиси Ван Цзяньлиннинг ягона меросхўри ҳисобланади. 

У севимли итига бағишлаб Coco Wang интернет-дўконига асос солган, бу ерда жониворлар учун махсус ўйинчоқлар ва аксессуарлар сотилади.