Samsung компанияси янги Galaxy Note 7 смартфонларининг портлашини - шошилиш ва ходимларининг ўта чарчагани натижаси ҳамда компаниянинг ўз қурилмасини Apple компанияси тақдимотидан аввалроқ тақдим этиш ва сотилган телефонлар бўйича ортда қолдириш истаги билан изоҳлаш мумкин. Бу ҳақда, Bloomberg агентлиги ишлаб чиқариш жараёни билан яхши таниш бўлган манбаларига асосланган ҳолда ёзмоқда. 

Агентликка кўра, iPhone 7 телефонларида кескин ўзгаришларга қўл урилмагани ва смартфонлар бозорида инқилоб ясамаслиги тўғрисидаги хабарларга асосланган Samsung раҳбарияти Note 7 телефонларини савдога чиқаришни тезлатиш билан 2016 йилда Apple компаниясини ортда қолдириш мумкин, деб ҳисоблаган. Шу туфайли компания смартфон таснифини тасдиқлаб, тақдимот маросимини 3 август кунига белгилаган.

Samsung компаниясига бутловчи қисмлар етказиб берувчи фирма вакилининг сўзларига кўра, тақдимот маросими яқинлашгани сайин ишчилар деярли дам олиш кунисиз ишлаган, буюртмачи эса тинимсиз қурилма таснифини ўзгартирган. Шу билан бирга, Samsung ишчиларининг ўзига ҳам босим кучайтирилган. Улар идоранинг ўзида қолишларига тўғри келган. 

Note 7 аккумуляторларининг портлаши ва телефоннинг ёниши билан боғлиқ мурожаатлар келиб туша бошлагач, компания муаммони бартараф этиш устида ҳам узоқ вақт бош қотирган. Нуқсонли смартфонларни қайтариб олиш билан бирга аккумуляторларни алмаштириш масаласи ҳам кўриб чиқилган. Айни вақтда, Samsung 2,5 миллион дона смартфонни қайтариб олган, Жанубий Кореяда савдолар 28 сентябрда қайта бошланади.