БМТ маълум қилдики, Суриянинг Ҳалаб вилояти ҳудудида ташкилотнинг инсонпарварлик юклари ортилган юк машиналаридан иборат карвони ҳужумга учраган. Бу ҳақда Reuters хабар тарқатди.

БМТ матбуот котиби Стефан Дуяричнинг маълум қилишича, конвой 31та автомобилдан иборат бўлган, шулардан 18таси ҳужумдан зарар кўрган.

Унинг қайд этишича, конвой олиб кетаётган юклар Урм ал-Кубра шаҳридаги 78 минг киши учун мўлжалланганди.

Бундан ташқари, Суриядаги Қизил яримой (SARC) жамияти биноси ҳам ўққа тутилган.

19 сентябрь куни Сурия армияси ўт очишни тўхтатиш муддати тугаганини маълум қилди. Бунга террорчилар тинчлик режимидан жангариларни қайта гуруҳлаш ва ҳужумларни давом эттириш мақсадида қурол-яроғ тўплашда фойдалангани сабаб бўлди.

Сулҳ тартиби 12 сентябрь куни амалга кирган эди.