21 сентябрь куни Ўзбекистон Паралимпия терма жамоаси Бразилиянинг Рио-де-Жанейро шаҳридан Тошкентга қайтиб келади. Паралимпиячиларимиз жой олган самолёт тонгда, соат 06.15да Тошкент халқаро аэропортига келиб қўнади.

"Gazeta.uz" хабарига кўра, ҳозирда Тошкентда Ўзбекистон Паралимпия терма жамоасини ҳам худди Олимпиадада иштирокчилари сингари катта тантана билан кутиб олиш учун тайёргарлик кўрилмоқда.

Паралимпиячилар учун ҳам давлат байроқлари ранглари, XV Паралимпиада рамзлари ва гуллар тасвирлари туширилган икки қаватли автобуслар ҳозирланган.

Даблдекарларнинг ён томонига "Биз сиз билан фахрланамиз!" ва "Ўзбекистон - келажаги буюк давлат!" шиорлари туширилган.

Делегация аэропортдан Бешёғоч кўчаси орқали Миллий олимпия қўмитаси биносигача юриб ўтади.

Эслатиб ўтамиз, мусобақада 5та спорт турида 32 нафар спортчи билан иштирок этган Ўзбекистон паралимпиячилари делегацияси якунда 31та медални (8та олтин, 6та кумуш ва 17та бронза қўлга киритиб, 16-ўринни эгаллади.

Паралимпия ўйинларида ўзбекистонлик спортчилар томонидан 6та жаҳон, 7та Паралимпия ўйинлари, 12та Осиё рекорди ўрнатилди.