Эронда 1980 йили Ироқ босқинига қарши уруш бошланган санага 36 йил тўлган кунда йирик ҳарбий парад ўтказилди. Унда мамлакат қуролли кучларининг янги кемалари ва ракеталари намойиш этилди.

Теҳрондаги парад давлат телеканаллари орқали трансляция қилинди. Парад чоғида ҳарбийлар майдондан марш қилиб ўтишди, узоқ радиусли ракеталар, танклар ва С-300 зенит-ракета қурилмалари намойиш этилди.

Шунингдек, Форс қўлтиғи қирғоғидаги Бандер-Аббос порти сувларида Эрон ҳарбий-денгиз кучларининг 500та кемаси, вертолётлар ва сув ости кемалари иштирокида парад ўтказилди.

Америкаликлар маълумотларига кўра, Форс қўлтиғида Эрон ва АҚШ муносабатлари стратегик жиҳатдан таранглашиб бормоқда.

2016 йилда Форс қўлтиғи сувларида икки томон кемаларининг бир-бирига хавфли даражада яқинлашиши билан боғлиқ 30та ҳолат қайд этилди. Бу ўтган йилги билан солиштирганда 2 баробар кўпдир.

Теҳронда Эрон қуролли кучлари бош штаби раҳбари Муҳаммад Ҳусайн Бакири мамлакат тинчлик тарафдори эканини таъкидлаб ўтган. Лекин у Эронга 1980-1988 йилларда Ироқ билан олиб борилган уруш "сабоқ бўлгани"ни қайд этиб ўтган.