Филиппин президенти Родриго Дутерте мамлакат ҳудудидаги "наркотиклар билан уруш"ни тўхтатиш бўйича талабга жавобан Европа Иттифоқига қатъий рад жавобини берди ва буни у ўрта бармоғини кўрсатиш билан ифодалади.

"Мен Европа Иттифоқи менинг ҳаракатларимни қоралаётганини кўриб турибман. Мен уларга "тошингни тер" дейман. Улар гуноҳлари афвини пулга сотиб оладиганлар. Шу ҳолида мени муҳокама қиладими? Жаҳаннамга кетинг", деган Дутерте ва ўрта бармоғини кўрсатган.

Президентнинг сўзларига кўра, ЕИ мамлакатлари "ўтмишдаги мудҳиш, ноинсоний жиноятлари" туфайли айбдорлик туйғуларини ҳис қилмоқда ва бугун ўзларини инсон ҳуқуқлари курашчиси сифатида кўрсатмоқда".

Турли маълумотларга кўра, Дутерте жорий қилган рейдлар давомида Филиппинда 3 мингга яқин гиёҳвандлар ва гиёҳвандфурушлар ўлдирилган. Мамлакатда полициячилар наркодилерлар билан алоқадорлиги гумон қилинган кишиларни йўлларда судсиз, сўроқсиз отиб ўлдирмоқда.

Бундан олдинроқ, Дутерте худди шу масалага эътиборини қаратгани учун АҚШ президенти Барак Обамани "фоҳишанинг ўғли" деб ҳақорат қилганди. Дутерте америкалик ҳамкасби Барак Обамага инсон ҳуқуқлари бўйича маслаҳатлари билан "ҳар ерга бурун тиқмаслик"ни маслаҳат берганди. 

Кейинроқ, у бу сўзлари учун узр сўради.

Кўп ўтмасдан, у БМТ Бош котиби Пан Ги Мунни унинг инсон ҳуқуқлари соҳасидаги сиёсати ҳақида фикр билдира туриб, "тентак" дея атади.