АҚШ етакчилигидаги халқаро коалиция ҳарбий ҳаво кучларининг Дайр аз Зордаги Сурия қўшинларига берган авиазарбалари қасддан амалга оширилган. Сурия Араб республикаси президенти Башар Асад Ассошиэйтед Пресс агентлигига берган интервьюсида шундай фикрни билдирган

Унинг сўзларига кўра, Сурия армияси эгаллаб турган позицияларга бир соатлар давомида авиазарбалар берилган. 

"Бу биттагина самолётнинг бехосдан ҳужуми эмас эди. Бу 4та самолёт бўлиб, улар суриялик аскарларга бир соат ёки ундан ҳам кўпроқ вақт давомида ҳужум уюштирган. Ҳужум бехосдан содир этилган бўлса, бир соат давом этиши мумкин эмас", — деб қайд этган Асад.

ИШИДга қарши коалиция самолётлари 17 сентябрда жангарилар қуршовида бўлган Сурия ҳукумат кучларига 4 бора зарба берган, бунинг оқибатида 62 нафар ҳарбий хизматчи ҳалок бўлиб, 110га яқини жароҳатланган эди. 

Америка қўмондонлиги авиазарбалар берилганини тан олган бўлса-да, Москвани бундан огоҳлантирганини таъкидлашди. Уларга кўра, америкаликлар Россиядан ушбу ҳудудда суриялик ҳарбийлар бўлиши мумкинлигини билгач, ҳужум қилишни дарҳол тўхтатишган. 

Россия ТИВ ўз навбатида, АҚШнинг бу каби ҳаракатларини террорчиларни қўллаб-қувватлашга қиёслади.