Россиянинг Москва вилоятида фавқулодда вазиятлар вазирлигига тегишли Ми-8 вертолёти фалокатга учради, деб хабар бермоқда ТАСС ахборот агентлиги.

Дастлабки маълумотларга кўра, фавқулодда ҳолатга вертолётни бошқаришдаги хатолик ва техниканинг ишламай қолгани сабаб бўлган бўлиши мумкин.

Вертолёт Люберецк туманидаги Октябрьский аҳоли пункти яқинида қулаган. Воқеа жойида шошилинч хизматлар ходимлари иш олиб борган. Ерда қурбонлар ва вайроналар бўлмаган.

Маълум қилинишича, вертолёт экипажи ўта оғир вазиятларда қутқарув технологиясини сайқаллаш бўйича ўқув машғулот парвозини амалга ошираётган бўлган. 

Вертолёт қулагандан кейин ёниб кетган. Қутқарувчиларнинг айтишича, вертолёт буткул вайрон бўлган.

"Интерфакс" ахборот агентлиги манбасининг айтишича, машғулот ўтаётган учувчи мураккаб об-ҳаво шароитларида мўлжални тўғри ололмаган бўлиши мумкин, бироқ вертолёт қулаши вақтида уни турар жой ҳудуди устидан олиб кетишга қарор қилган.

Вертолёт экипажининг барча уч аъзоси ҳалок бўлган.

Россия ФВВда маълум қилинишича, вертолёт бортида экипаж сардори, ФВВнинг Жуковский авиацион-қутқарув маркази раҳбари 38 ёшли Роман Фролов, иккинчи учувчи, унинг ўринбосари 42 ёшли Дмитрий Арсентьев, борт-муҳандис 32 ёшли Максим Филиппов бўлган.

Вазирликда таъкидланишича, бу учувчилар кўплаб оғир қутқарув операцияларида иштирок этганлар ва юқори малакали мутахассислар бўлганлар.

"Бу Россия ФВВ авиацияси учун, учувчиларнинг яқинлари ва оилалари учун даҳшатли фожиадир. Инсонлар ҳаётини қутқариш бурчи бўлган катта профессионаллар ҳаётдан кетдилар", деб айтилди ФВВда.